BCCIની મોટી જાહેરાત, ટીમ ઈન્ડિયા પહેલીવાર આ દેશ સામે રમશે સિરીઝ

ભારતીય ક્રિકેટની આગામી સીઝન અંગે BCCI એ એક મોટી અને ઐતિહાસિક જાહેરાત કરી છે. BCCI એ ટીમ ઈન્ડિયા, ઈન્ડિયા A અને ભારતીય U19 ટીમો માટે વ્યસ્ત સ્થાનિક શેડ્યૂલની જાહેરાત કરી છે, જેમાં ભારત અને ઝિમ્બાબ્વે મહિલા ટીમો વચ્ચેની પ્રથમ દ્વિપક્ષીય સિરીઝનો સમાવેશ થશે. આ નિર્ણયને ભારતીય મહિલા ક્રિકેટ માટે નવી શરૂઆત માનવામાં આવી રહ્યો છે.

BCCI દ્વારા જાહેર કરાયેલા શેડ્યૂલ મુજબ ભારતીય સિનિયર મહિલા ટીમ ઓક્ટોબર 2026માં ઝિમ્બાબ્વે મહિલા ટીમનું આયોજન કરશે. આ બંને દેશો વચ્ચેની પ્રથમ દ્વિપક્ષીય સિરીઝ હશે, જેમાં કુલ 6 વ્હાઈટ-બોલ મેચ રમાશે. રાયપુરમાં 3 T20 ઈન્ટરનેશનલ મેચ રમાશે, જ્યારે બરોડામાં 3 ODI મેચ રમાશે.

આ સિવાય સ્થાનિક સિઝનમાં ઘણી રોમાંચક મલ્ટી-ફોર્મેટ સિરીઝનો પણ સમાવેશ થાય છે. ભારત A (મેન્સ) ટીમ સપ્ટેમ્બર અને ઓક્ટોબર 2026 દરમિયાન પુડુચેરીમાં ઓસ્ટ્રેલિયા A સામે બે ચાર-દિવસીય મેચ અને ત્રણ ODI મેચ રમશે. આવતા વર્ષે યોજાનાર ODI વર્લ્ડકપને ધ્યાનમાં રાખીને આ સિરીઝ મહત્વપૂર્ણ માનવામાં આવે છે.

ઈન્ડિયા A ઓસ્ટ્રેલિયા અને ઈંગ્લેન્ડની ટીમોનો કરશે સામનો

આ દરમિયાન ભારત A મહિલા ટીમ પણ મેચ રમશે. ટીમ સપ્ટેમ્બરમાં મોહાલી અને ધર્મશાલામાં ઓસ્ટ્રેલિયા A મહિલા ટીમ સામે મલ્ટી-ફોર્મેટ સિરીઝ રમશે, જેમાં 3 T20I, 3 ODI અને એક મલ્ટી-ડે મેચનો સમાવેશ થશે. ત્યારબાદ સિઝનના અંતે પુણે અને નવી મુંબઈમાં ઈંગ્લેન્ડ A મહિલા ટીમ સામે સમાન ફોર્મેટમાં મેચો રમાશે.

U19 સ્તરે ભારતીય ટીમો માટે વ્યસ્ત શેડ્યૂલનું પણ આયોજન કરવામાં આવ્યું છે. ભારતીય U19 પુરુષ ટીમ ઓસ્ટ્રેલિયા U19 ટીમનું આયોજન કરશે, જ્યાં રાજકોટમાં 3 ODI અને રાજકોટ અને અમદાવાદમાં 2 મલ્ટી-ડે મેચ રમાશે.

શ્રીલંકા સામે U19 મહિલા ટીમ 6 મેચ રમશે

આ દરમિયાન ભારતની U19 મહિલા ટીમ જૂન-જુલાઈ 2026 માં ચેન્નાઈ અને પુડુચેરીમાં શ્રીલંકા U19 સામે 6 મેચની વ્હાઈટ બોલ સિરીઝ રમશે. ત્યારબાદ નવેમ્બર-ડિસેમ્બરમાં બરોડા અને સુરતમાં ઈંગ્લેન્ડ U19 મહિલા ટીમ સામે પાંચ મેચની T20 સિરીઝ રમાશે. એકંદરે BCCIનું આ શેડ્યૂલ ભારતીય ક્રિકેટના ભવિષ્યને મજબૂત બનાવવા તરફ એક મોટું પગલું છે. ખાસ કરીને ભારત અને ઝિમ્બાબ્વે મહિલા ટીમો વચ્ચેની પ્રથમ દ્વિપક્ષીય સિરીઝ ક્રિકેટ ફેન્સ માટે એક નવો અને રોમાંચક અનુભવ લાવશે.

ઝિમ્બાબ્વે મહિલા ટીમનો ભારત પ્રવાસ

16 ઓક્ટોબર, 2026: પહેલી T20, રાયપુર (સાંજે 7:00 વાગ્યે)

18 ઓક્ટોબર, 2026: બીજી T20, રાયપુર (સાંજે 7:00 વાગ્યે)

20 ઓક્ટોબર, 2026: ત્રીજી T20, રાયપુર (સાંજે 7:00 વાગ્યે)

23 ઓક્ટોબર, 2026: પહેલી વનડે, બરોડા (બપોરે 7:00 વાગ્યે)

25 ઓક્ટોબર, 2026: બીજી વનડે, બરોડા (બપોરે 7:00 વાગ્યે)

28 ઓક્ટોબર, 2026: ત્રીજી વનડે, બરોડા (બપોરે 7:00 વાગ્યે)

આ પણ વાંચો: BCCIએ શુભમન ગિલને નવા T20 કેપ્ટન તરીકે કર્યો નિયુક્ત, સૂર્યકુમાર યાદવ પાસેથી છીનવાઈ કેપ્ટનશીપ?